لك حبيبي في ثنايا جوف هالقلب احترام

يا هيام ٍ في هيام ٍ في هيام ٍ في هيام
يا ضياعي يا اتجاهي يا دروب المهتدي

لو تذوق النوم جفني ما تهنّى بالمنام
طاوله فيك الغرام وطاوله فيك سهدي

كيف اصبحك بسلام وكيف امسيك بسلام
وانت في مجرى وريدي مع سواقيه تغدي

لك عيوني لك حياتي لك سنيني لك مقام
لك حلالي لك فؤادي لك ورودي وشهدي

فوق كفك دق حنّا والبلا فعل الزمام
والحلا ليل ٍ تسلل فوق الامتان اجعدي

لا طويل ولا قصير ويا حلو زين القوام
جلّ من صوّر جمالك في غرامك مولدي

ما لقينالك شبيه ٍ في غنادير الشوام
وما لقينا لك شبيه ٍ في بنات الاحمدي

انت دانه وانت ايه وانت عشق المستهام
وانت نادر في عيوني يا عيوني وسعدي

وانت والله يا صغير الحب من قبل الفطام
ما قصرت الفكر دونك لا ولا ضاع جهدي

وانت غاية مقصدي يا روح روحي والغرام
وانت شف البال والله وانت غاية مقصدي

احسد البرقع عليك ولا حسدت الا لثام
كيف ما يخجل وليله ما غدى عنه اجودي

فوق خدك حب خالك وازعلوا منه العمام
كيف يقدر يستبيح الخد يا خد ٍ ندي

ترتدي ثوب الشرف والعز من فوقه وسام
كيف ما يصبح وسامك وانت عزه مرتدي

بنت شيخٍ ما توانى ما يفك الا الزحام
فزعة اللي ينتخي ويصيح تكفى يا سندي

والحظيظ اللي قرب حظه من حظوظ الكرام
ما خشى شر الزمان ولا خشى الحظ الردي

اترك الواقع واعيشك في خيالي بنسجام
واربط الواقع باحلام الخيال السرمدي

ما بغيتك فالظلام ولا بغيتك بالحرام
ما بغيتك غير بالعز الشريف المقتدي

ما بغيتك بالتلاعب مابغيتك بالكلام
ما بغيت الا اخوك يصير خال ٍ لولدي