ميك اب جنان بالصور والاسعار كمااااااااااااااان .

اولا :: كريمات الاساس

من اليمين : ريفلون كر ستاى للبشرة الدهنية انا جايبة درجة 150 buff ومناسبة معايا .. مكتوب عليه spf 6 ومكتوب كمان انه بيقعد 24 ساعة .. هو ثباته حلو بس انا مجربتش اقعد بيه 24 ساعة كبيرى 12 ساعة فعلا بيبقى ثابت وتغطيته حلوة .. سعره 110 بلبل بس تقيل اوى للاستخدام اليومى يعنى يبقى حلو فى المناسبات والسهرات اكتر .. عشان كدا جبت اللى جنبه دريم مات موس من مايبلين انا جبت درجة classic ivory light 2 مناسبة لبشرتى وتغطيته حلوة للاستخدام اليومى وبرضه للبشرة الدهنية سعره 100 بلبل

من اليمين اماندا موس معجبنيش اوى وبيسيح فى الحر خلص ومش هجيبه تانى سعره 40 بلبل .. اللى جنبه جوردانى من اورفليم بحبه اوى وبقالى كتير كل ما يخلص اجيب منه تانى حلو اوى للاستخدام اليومى ومعايا انا مش بيسيح وبيثبت بس فى ناس تانية عليهم بيسيح سعره حسب الكتالوج بس بيترواح بين 50 و 60 بلبل

نخش بقى على
الباودر

دى صورة جميع الباودرات اللى عندى وفى صورة كمان والعلب مفتوحة

رقم 1 – جوردانا حلوة اوى اوى كخامة وكريمى كدا وناعمة بس للاسف الدرجة دى كانت غامقة اوى عليا ومدية على وردى الدرجة دى رقم 2 .. سعرها 40 بلبل

رقم 2 – باودر المانى اسمها MANHATTAN .. حلوة برضه اوى كخامة لكن للاسف جبت درجة غامقة عليا.. الدرجة دى اسمها بورسلين 15 وكان سعرها 25 بلبل

رقم 3 – باودر المانى برضه اسمها فور ايفر( FOREVER52 ).. بس دى غير ميك اب فور ايفر طبعا .. بس حلوة اوى درجتها حلوة عليا وتحتيها فونديشن لكن لو تحتيها كريم مرطب عادى بتبقى فاتحة شوية سعرها 60 بلبل

رقم 4 – باودر رخيصة جدا ومع ذلك حلوة اوى كنت بستخدمها مع جوردانى الفونديشن وكانت بتبقى حلوة اوى بس بطلت استخدمها عشان قلقانة من سعرها ده .. كانت ب 12 بلبل

رقم 5- باودر مائى درجة شيرى بينك بستخدمها فى الافراح فقط وطبعا كلنا عارفين ان تغطيتها حلوة اوى فى الافراح وبتدارى اى عيوب بس منصحش اللى بيستخدمها يوميا لانها بتهلك البشرة تقريبا سعرها 35 جنيه مش فاكرة

رقم 6 – لوس باودر كيس بيوتى وفيها لمعة .. للافراح والمناسبات بحطها بعد ما اخلص الميك اب كله .. حلوة اوى وكانت ب 25 بلبل على ما اعتقد

نيجى
للكونسيلر

رقم 1 – كونسيلر AGe Rewind من مايبلين : حلو جدا جدا جدا للهالات انا عندى الهالات اوفر شوية فجربت كونسيلرات كتير وده بجد وهم خفاها بشكل مش طبيعى انا جايبة درجة neutralizer سعره 95 بلبل

رقم 2 – كونسيلر ستيك من فلورمار .. حلو بس كان فاتح اوى فبالتالى مداراش الهالات وكمان ناشف شوية وده غلط على العين بيسبب الترهل يعنى ينفع للحبوب او البقع اكتر سعره 30 بلبل

رقم 3 – كونسيلر رخيص بس بجد حلو من ماركة انتشرت ف محلات الميك اب اسمها nitro سعره لا يتجاوز ال 10 بلابل تقريبا

نيجى
للبلاشر

من اليمين- بلاشر كريمى من E.L.F درجته حلوة بس رميت العلبة اللى كان مكتوب عليها الدرجة للاسف سعره 55 بلبل

الاتنين اللى بعده من ADS مش فاكرة اسعارهم بس لا يتجاوزوا ال 10 بلابل درجاتهم حلوة والصورة اللى تحت والعلب مفتوحة عشان تشوفوا الدرجات