واعتقد نحن الرجال علينا تفهم احتياجات المرأة كيف لا وهي الزوجه وام العيال وسترك وغطاك
انا ما اقول للرجال دلعوا حتى ان حريمكم يركبن عليكم وتصيروا لا بتهشوا ولا بتنشوا في البيت
لكن خوفوا الله فيهم والله ثم والله انهن مسيكينات يكرفن في البيت كرف ما يعلمه الا الله
غسيل
كنس وتنظيف
مدابل البزران ( مدابل = تحمل المشقه )
غير وظيفتها لو كانت موظفه
غير العزايم والمسايير اللي تجي عند سعادة البيه في البيت هذا عشاء وهذا شاي وذيك قهوه
وبعد يوم شاق يجي طويل العمر يبي شموع ولبس ونظافه والبزران نايمين لو تعطيهم ابر منومه ماعنده مانع
وياخذ ما يبي ويصكها نومه ولو قام واحد من البزران قال ضفي وجهك انتي وياه وراي دوام
يا جماعه والله خطأ هذولي بشر وامانه في ارقابنا
اسمعوا وش يقول رب العالمين
( وعاشروهن بالمعروف )
واسمعوا قول المصطفى عليه الصلاة والسلام ( خيركم خيركم لاهله وانا خيركم لاهله )
( رفقا بالقوارير ) والمقصود رفقا بالنساء
وقوله ( استوصوا بالنساء خيرا )
وقد ثبت عنه صلى الله عليه وسلم انه كان يساعد اهل بيته في عمل البيت
وقد سابق زوجته عائشه رضي الله عنه والمقصود بذلك ادخال السرور والفرح لقلب الزوجه
وبعد هذا كله يجي من يقول اكرب وجهك عليها وطنشها وافعل بها وما تتنتلقى وجه وغيره من الكلام الشوارعي البغيض شرعا وادبا وتعاملا
اخواني كما قلت سابقا لاتكون رخمه مره الدركسون مع المدام ولا تكون في نفس الوقت اناني ما تفكر الا براحتك بس وتقعد بالشهور ما طلعت منك كلمه حلوه
المرأه تبي رجال جاد وشديد معها تحس برجولته وقسوته عليها احيانا لكن قسوه لهدف الاصلاح وليس بهدف الانتقام والتشفي
وتبي في نفس الوقت الشخص الحنون اللي يدلعها ويسمع منها ولا يقاطعها وهي تشكي بقوله عندي حل او انتي كثيرة شكوى وانتي وانتي ………..
تبي من يسمع منها لانك لو ما سمعت منها وكفكفت دموعها راح تبحث عن غيرك تشكي له وهالامر صار لي شخصيا مع بعض الزوجات اللي يشتكن من ازواجهن وممكن يطيحن في شخص يستغلهم وانت يا عنتر زمانك زي الاطرش في الزفه
طيب وش يمنع تدخل البيت وزوجتك في المطبخ وتقول لها اساعدك عمري صدقني ما راح تقول ايوه بس شي نفسي لها
وش يمنع اذا جيت تنام تمسح على راسها وتقول بصراحه بيض الله وجهك ما قصرتي معي ذا اليوم
صدقني لو كانت مقصره وهي تدري بذا الشي راح تقوم الصبح من النجمه على قولة المصريين وتحرث البيت بسبب ماذا ؟
بسبب كلمه قويه عليها بسيطه منك
الخلاصه
الزوجه تبي الشخص اللي يعسفها ويشد معها لمصلحتها ومصلحة البيت
وتبي رجل يسمع منها ويشاركها همومها ويسمعها كلام يحفزها وينشطها
طرفه من رجل احمق
( قال لي احد الاصدقاء قبيل زواجي وهو يوصيني بالشده على زوجتي وخلاني زي اللي داخل معركه ؟ لا تطيع زوجتك ابد حتى لو قالت جب صامولي للبيت رح وجب خبز مفرود )
ما اقول الله يعظم اجر زوجتك واجر اغلب الزوجات
اوكي انا طولت عليكم بس لا تقرأ وتمشي
علق على الموضوع خلوني اسمع منكم وش في روسكم
وأتمنى من كل زوج على وجه هذه الأرض يسمع كلامك ويطبقة .
الله يوفقك دنيا وأخره
فتحت جروحي خلني ساكت احس اتألم لحالي بدون فضايح على هالحياة مع هؤلاء الرجال اقصد اشباةرجال
ودمتم