مواقف ريمكس ****الطريفة

وبصراحه انا كنت خايف منهم مهوب ثقه … قبل اسبوع من مشكلتي هذي طاح واحد من الربع في قليب غويطه ومظلمة وكان طيب ويحاتسينا ومافيه شي وقلنا خل ننادي الدفاع المدني يطلعونه ويا ليتنا ماناديناهم … طب واحد منهم في القليب بحبله ويوم طب صرنا ما نسمع الا شهاق خوينا وبعدها سمعنا العسكري حق الدفاع المدني يصايح على خوياه ارفعوه … يوم رفعوا خوينا اللينه ميت رابطين الحبل في رقبته ..

المهم الـ911 دخلو مفك مع طرف شنطتي وفتحوها شوي مع الطرف وقالو لي يله دخل خشتك واعرم بسرعه … وبصراحه ما قصرو نجحت العمليه وكلت خبزتي …
ــــــــــــــــــــ
يومني صغير كانت عيارتي سنجوب علشان سنوني طالعه برى وكنت ما اقدر اصك ثمي عليها … الي يشوفني يقول زيد انفقع في ثمه شرخ … وكان مدرس العلوم يستخدمني كوسيله ايضاح في درس القوارض …لكن ولله الحمد قدرت ادخل سنوني في ثمي بس بعد شق الانفس وابعلمكم الطريقه ولو اني مابعد سجلت براعة الاختراع لكن تستاهلون والي بيستفيد ابغاه يدعي لي … والقصه انه يوم كان عمري 10 سنين رحنا للرياض انا والوالد الله يرحمه عنده شغل يوم خلص شغله خذنا لنا تكس شفر ورجعنا للديره وحنا في الطريق نسم علينا كفر الشفر وما معه استبنه والحمدلله ان الموتر ما نسم الا جنب بنشر … رحنا للبنشر يزين الكفر قال الكفر منصلخ معاد يصلح لازم تركب كفر جديد قلنا طيب عندك كفرات … قال ايه بس الكفرات الي عندي مقاس 15 وجنط موتركم مقاس 16 … انا لله وانا اليه راجعون وش السوات وش الحل … وبعد تفكير وخذ وهات وكثر كلام قال راعي البنشي عندي حل ليش ما ندخل الكفر الـ15 في الجنط الـ16 بالقوه … قلنا وشلون … قال اجمعو حطب وشبو نار وانا اعلمكم … جمعنا الحطب وشبينا النار وجاب الكفر وقعد يحميه على النار الين صار لين مره ثم جاب الجنط ودخل الكفر بسهوله وتفخه وركبه … ثم ركبنا مع راعي التكس انا وابوي وجينا للديره … وفي ذاك اليوم ماجاني النوم قعدت افكر واهوجس … وما دريت والا انا ناقز من غير راي واصايح وجدتها وجدتها وجدتها … خلاص خلاص خلاص معاد احد معايرني سنجوبي خلاص … طمرت وجبت ولاعه وقعدت اسخن براطمي اللين صارت لينه مره قمت وبعد مجهود كبير ودخلت السنون في ثمي وصكيته وبصراحه كان مجهود شاق مليت وانا ادخلهم كلما دخلت السنون الي فوق نتقت الي تحت ارجع وادخل الي تحت تنتق الي فوق الين قدرني الله ودخلتهم كلهم …. والحمدلله والشكر لله افتكيت وارتحت من عيارة سنجوبي … بس المشكله انهم قاموا يعايروني برطومي ….
ــــــــــــــــــــــ

الله يا ايام اول الله يذكرها بالخير ويخلي لي اميمتي … كانت تتك الغتره على رقبتي اللين يصير وجهي احمر ويطلع لساني … والمشكله ان حتى المدرسين ماعرفوا يفكون الغتره الظاهر ان اميمتي تغير ارقامها … وكنت ارجع فسحتي للبيت ما اقوى ابلعها …وكان المدرس اذا سال سؤال يحاول ينسم لي شوي علشان اجاوبه … بس تعلمت شي مهم هو اني ما اهتم اذا زنطني احد …
ــــــــــــــــــــــ
يازين ايام اول ايام غلا السراويل … وحنا طالعين من المدرسه نمر من عند الشياب الي صافين في العاير يتشمسون تشوف وانت مار من عندهم انواع الغربان ؟؟؟   …. ومن كثر مانمر من عندهم قمنا نعرفهم من غربانهم … وفي الاخير يقولون لنا والله انكم ماتتعبون تعبنا
ــــــــــــــــــــ
كانت بيوت اول متلاصقه مع بعضها … وفي يوم من الايام كان ولد خالتي نايم عندنا (عيارته هي كانك ولد ابوك المسني وكان مايترك حقه يضيع ابد مره كنت نايم عندهم قمت في الليل ابشرب وكان هو في سابع نومه ووطيت طرف مخدته مادريت وقام يمشي وهو نايم ووطى مخدتي ورجع لمحله ونام)

المهم نرجع للسالفه يوم نمنا في الليل قمت حسراااااااان مره ابغى اشرب مويه … ومن شدة ماانا حسران قمت اتلمس الجدار ادور الفيش اولع اللمبات نسيت ان الكهرب مابعد وصل الديره وان بيتنا مافيه افياش … وانا امشي مادريت وطيت رجل ولد خالتي الشري … انا لله وانا اليه راجعون والله البلشه والله الي منيب منفك منه … وهو الي يقوم كن قارصه عقرب وانا الي اكفخ وهو وراي وطبيت في بيت جيرانا وكانو يتعشون وكان مع جدهم عظم يلحسه (ماله سنون ) و طمرت عشاهم وهم قاعدين وطمر قشيران ولد خالتي وراي … وانا الي اطب على جيرانا الثانيين وكانو نايميين وهو الي يطمر وراي … قمت وتسحبت شوي شوي ونمت بينهم علشان مايلقاني ومن القهر والحظ الشين نمت بين امهم وابوهم … وما امداني ارفع راسي اشوف قشيران راح الا وابوهم يمسك يدي يقول لي هيش ناظري نامو البزران والا لا انا لله هذا وقته … وما دريت الا ولد خالتي يجرني بغالوقتي في آخر لحظه … وحبيت يده وشكرته على انه انقذني من سوء التفاهم الي بغى يصير … وصار قفل قال لي تحبب والا ماتحبب واطي رجلك واطيها حقي مايضيع … قلت له اوطها خذ راحتك انا مدين لك بعمري … قال يله رح نم زي النومه الي كنت نايمها ومد رجلك زي ماكنت مادها ورحت ونمت في مكانه ووطى رجلي … ورجعت ونمت في محلي وانا حسران … بس المشكله وش ذا القاسي في مخباتي … طلعته وانا خايف لكن اشوى صار العظم الي كان يلحسه العويد …
ـــــــــــــــــــــــ
اول كان الناس ماينومون الا في السطوح ومع ذلك كل سنه بزر لا وبزران مايعرفون السخاين… مع ان رجاجيل اول طول اليوم كرف سوالف في العاير الا انهم يقومون بالواجب احسن من هالحين غرف ورفاهيه ومكيفات ووو وفي الاخير بزارين مافيه سخونة ماتجيهم يمكن السر في نومة السطح ؟..
ــــــــــــــــــــــــــــــــ
ريماكس كان يحب مرته حب لدرجة انه اعترف في يوم من الايام ومن غير شعور قدام الناس انه يحبها اكثر من الحمار حقه …
المهم سخنت مرته وماتت … وقعد يصيح عقب مادفنوها ورجع لبيته وهو يصيح كنه بزر … واجتمعوا الناس يبون يهدونه ويصبرونه ويسكتونه … وقالو له اصبر وبيعوضك ربي احسن واجمل منها … قال لهم وهو بيتسي باعلى صوته طيب احتسولي في الليله وش السوات … ماقلت لكم انواع الرومانسيه ؟؟؟

ـــــــــــــــــ
ــــــــــــــــــ
ـــــــــــــــــ
المرأه / هذا الكائن اللطيف ماذا عساني ان اقول عنه … فمهما قلت عنه لن اوفيه حقه … فالمرأة رمزا للتضحية والحب والحنان والوفاء … انها شمعة تحترق لتضيء الطريق للأخرين … انها وباختصار جنة الدنيا …
(( ترى الي قال هالكلام مسجون هالحين ويحقق معه ومالي دخل))