……………..على منازل مَنْ ذبحني هواها
وخايلت عيني مثل ناشي غماما
……………..تسقي ثرى الخدّين من سيل ماها
القلب يكفخ في ضلوع ٍ حطاما
……………..والروح راحت مثل ليلٍ طواها
ونّيت ونّة راعبيّة حماما
……………..على غصون الشوق تسجع غناها
وحنّيت أجاوبها الخلوج الهياما
……………..يوم أوهست للبوّ درّت لباها
وصفّقت بالكفّين حالي عداما
……………..ونفسي تململ كن غلث ٍ دهاها
وناديت باعلى الصوت منّي علاما
……………..راح الحبيّب عن ديارٍ بهاها
هاذي بواقي دارها يا حراما
……………..ياما سكن فيها وياما وطاها
ياما تجاورنا وياما وياما
……………..وأنا اهتويها قبل تلبس عباها
ياما سرى بيني وبينه غراما
……………..وحنّا صغارٍ ما حسبنا تلاها
ومرّت سنين العمر مثل الحلاما
……………..ومع كل يوم ٍ زاد عندي غلاها
ما عدت خايف في هواها ملاما
……………..وأجلس طويل الليل أرقب سماها
ولمّا غفلت وحام حولي الظلاما
……………..قالوا تغرّب ديرتك وا بلاها
شحّت مواردها ولا به مراما
……………..وأطلب لك العليا بديره سواها
قلت الحبيّب! قام كلٍ ولاما
……………..قالوا علامك ما تميّز خطاها
بالعلم لازم يرتفع لك مقاما
……………..كم المحبّه ضاع رجلٍ وراها
وهزّيت راسي عن كثير الكلاما
…………….. وأمسيت في دارٍ بعيدٍ مداها
أقلّب الجنبين ما اهنى مناما
……………..والعين تنثر هاملٍ من بكاها
علّقت قلبي للهوى في خطاما
……………..وحلفت خلّي ما يقرَّب حماها
لا أعطي سواها خافقي والذماما
……………..هذيك عندي مثل روحي غلاها
يا كم عِرض لي حب لاما ولاما
……………..وأغضيت كنّي عامي ٍ ما لِقاها
أصبر على حبي طوال العواما
……………..ولا أجرح هوى مَنْ طال عنّي جفاها
يا مَنْ يوصّل لي لخلّي سلاما
……………..ويفعل بنا حسنى ويكسب جزاها
وصلاة ربي بالكمال وتماما
……………..على الذي به كل الأمه حباها
نونو
الله يسلم غاليك تحياتي
لك ودي واحترامي
