ابغى حل

بسم الله الرحمن الرحيم

اخواتي اخواني

عندي مشكله مع زوجتي وودي اسمع وجهااتك نظركم خاصة

اولا ابداء بنفسي انا انسان ازعل بسرعه وأرضى بسرعه بس قسم بالله ماأحب احد يزعل علي واحب الناس كلهم طبعا ادرس برا السعودية

زوجتي حامل بالشهر التاسع وميب عندي بمقر دراستي

ضروف المشكلة
رجعت زوجتي عشان تولد عند اهلها,, وبرحلة العودة توفى والدي وقبل ارجع لمقر دراستي قلت لزوجتي ان تجلس مع امي قدر الامكان واتفقنا انها تكون 3 ايام عند اهلي 3 ايام عند اهلها بحكم انهم قريبين من بعض حيل .
زوجتي طبعا تخلق كل يوم عذر عشان ترجع لأهلها ولا تجلس عند امي وبالمره الاخير صار بينا مشكله حول هالموضوع وعصبت عليها وقلت لها روحي اجلس عند اهلي 5 ايام كعقاب وجلست يومين ورجعت واتصلت علي وتقولي وتخانقت وقعدت تبكي وتعتذر وقالت على شانك بروح اجلس عند امك ولاتزعل وتراضينا وانتهت على المشكله على هالاساس ما راحت لامي وجلست عند اهلها يومين وبعد يومين راحت لامي وجلست يوم ورجعت لأهلهاا ويوم سئلت ليس سويتي كذا عطتني عذر كالعادة وسئلتها ليش ذاك اليوم مارحتي ؟ قالت كنت غلطانة وخلاص لاتسأل من جد ردها قهرني وكانت المكالمة اخر الليل … وقلت لها اذا جات الساعه 9 ومارحتي لآهلي انتي طالق وتجلسين عند اهلي 9 واذا طلعتي من بيتهم انتي طالق
لان اللي اشوفه من تصرفات البنت عدم اهتمام ودايم تكسر كلمتي… وفعلا راحت الصباح بدري زطبعا طول الفتره كانت تتصل وما أرد عليها وترسل وما أرد عليها
من جد احترت مع هالبنت واحس اني كرهتها وودي اعرف ليش تصرفت كذا
طبعا مكالمتنا العادية كلها حب وشوق والبنت انا مدلعها كثير وماني مقصر عليها بشي لا عاااااااااطفيا ولاماديا.

ارجووو افادتي بالتصريف السليم لحل مشكلتي بأسرع وقت لاني والله اليوم شي واحد مانعني من الطلاق اللي هو ولدنا اللي ببطنها

ودمتم بسعادة
*

تصرفك سليم

بس اسمح لي

كلمه طالق لاتتعود عليها !

لاتفتح لك باب من ابواب الشيطان

تراه حريص

والله لو انه شنو لاتتعامل اسلوب التهديد

نصيحه لوجه الله

الحرمان هذي تكفي

يعني لو تصد عنها وتتركها ويعني بطريقتك الخاصة تقدر هي تجيك لمكانك

وصدقني ونصيحه للجميع

لاحد يتعامل باسلوب تهديد بالطلاق

ان مافعلتي ؟ بطلقك

ان ماسويتي ؟ بطلقك

هذا راح يجي يوم قد تندم وتفعله اثناء العصبية بين الطرفين ومايسوى عليك هالشيء ياخووي

ارجو تراجع فكرك واتمنى من كل قلبي انك ترفض هالشيء بتاتا

هذي ام عيالك

لازم تصبر وتتحمل

وهي لازم تصبر وتتحمل

زوجتي حامل بالشهر التاسع وميب عندي بمقر دراستي
==========================
يبه أتق الله في نفسك وهي فاضيه لك أنت وأمك الحين

لا حول ولا قوة إلا بالله .

أهي ألحين يبي من يراعي بنفسيتها ونت روحي لاتروحين

الواجب على الجميع أنه يراعيها …..

وبعدين ماجا أثبات كلامك إلا في هالوقت

ياليتك تسأل بس عن تغير نفسيت المرأة أثناء الحمل

ترى الحياة الزوجية يبغالها وزنية لاترخي ولاتشد

وبعدين تقول كرهتها تراك ماأنت شاري سيارة حتى تبيعها بأي وقت .

هذه زوجتك وأن شاء الله يجيك المولود ألي يسعدكم ويقربكم لبعض بالرغم أنكم إن شاء الله قربين لبعض .

اخي الغالي

زوجتك على وشك تولد وربما تفكيرها الان على صعوبة الولادة لانها اول مرة تلد

لذالك تفكيرها منصب على الولادة خوفا من عملية

والشي الثاني عند اهلها افضل لان لوجاء وقت الوالدة وهي عند أمك امرها صعب

وعند اهلها ابوها او اخوانها يذهبون بها للمستشفى

وربما عند اهلك صعب بحكم لا يجوز احد يوديها سوى ابوك فقط

لذالك اخي استهدي بالله الين تلد وكل شي في وقته بس انت شوي معصب واقدر حبك لامك

وهذا واجبك واشكرك عليه

انتظر الا ما بعد الولادة الله يوفقك ويرزقك الولد الصالح

أولا: لا تجعل الطلاق هو الذي تهدد به زوجتك بل أجعل أحترامها وحبها لك هوه ما يجعلها تنفذ كلامك ولا تكسره وثانيا:تفاهم معها قد تكون لا تجد الراحه في بيت اهلك مما يجعلها ترجع بسرعه لبيت اهلها ولاتنسى انها حامل وتحتاج الى رعايه خاصه

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

Scroll to Top